Gwamnatin Tarayya Za Ta Fara Rabon Bashi Marar Ruwa Ga Ƙananan Manoma -GEEP

Gwamnatin Tarayya Za Ta Fara Rabon Bashi Marar Ruwa Ga Ƙananan Manoma bisa tsarin Government Enterprise and Empowerment Programme (GEEP)

Barkanku da wannan lokaci, sannunku da sake kasancewa da wannan website namu mai albarka Mrkivi.Com

Gwamnatin Tarayya za ta fara rabon lamunin bashi marar ruwa ga kananan manoma da ‘yan kasuwa a fadin kasar nan kafin karshen shekarar 2025, in ji Hamza Ibrahim Baba, Manajan Shirin Government Enterprise and Empowerment Programme (GEEP) na kasa.

Baba ya bayyana hakan ne a ranar Juma’a a Kaduna yayin taron tattaunawa da shugabannin kungiyoyin ‘yan kasuwa da sauran masu ruwa da tsaki a sashen kasuwanci a jihar kaduna.

A cewarsa, kowanne mai cin gajiyar shirin zai iya samun lamuni har zuwa 100,000, karkashin shirin FarmerMoni na GEEP, wanda aka kera domin tallafa wa kananan manoma masu aikin kiwon kaji, kifi, dabbobi da kuma noman amfanin gona.

“Wannan matakin gwaji zai tallafa wa manoma a duk fadin kasar nan, tare da kananan ‘yan kasuwa ciki har da jihar Kaduna,” in ji shi.

Ya bukaci kungiyoyin ‘yan kasuwa da kungiyoyin hadaka su yi aiki tare da jami’an GEEP da masu tattara bayanai a kananan hukumomi 774 na kasar nan, domin tabbatar da cewa wadanda suka cancanta kawai za su amfana.

“Nasaran wannan shiri ya dogara ne da gaskiya da kuma tantancewa yadda ya kamata. Muna son mu kai ga wadanda suke da bukata sosai, ba wadanda ke neman damar yin amfani da tsarin ba,” in ji shi.

Baba ya bayyana cewa za a bai wa masu cin gajiyar shirin wa’adin watanni shida kafin a fara biyan lamuni, domin samun damar noman su ko kiwo kafin a fara dawo da kudaden. Ya ce kudaden za su taimaka wajen sayen taki, dabbobi, magungunan dabbobi da sauran kayan aiki da ake bukata.

Ya bayyana cewa shirin na karkashin Ma’aikatar Harkokin Jin Kai da Rage Talauci ta Tarayya, kuma yana daga cikin manyan shirye-shiryen National Social Investment Programme (NSIP).

A cewarsa, GEEP na bayar da lamunin bashi marar marar ruwa ga kananan masana’antu, ‘yan kasuwa kanana, masu sana’o’in hannu, matasa masu kananan kasuwanci da manoma, domin bunkasa sana’o’insu da kuma inganta hada-hadar kudi.

Ya ce akwai manyan sassan GEEP guda uku:

TraderMoni domin matasa masu shekaru 18 zuwa 45 da ke cikin kananan kasuwanci

MarketMoni domin mata da ke harkar kananan kasuwanci

FarmerMoni domin kananan manoma a karkara.

“Wadannan ba tallafi ba ne. Bashin ne, amma ba tare da ruwa ba. Manufar ita ce a taimaka wa talakawa su bunkasa sana’o’insu, su shiga tsarin hada-hadar kudi, sannan daga baya su samar da ayyukan yi,” in ji shi.

Ya kara da cewa lamunin yana farawa daga 5,000 zuwa 100,000 bisa tsarin da aka tsara domin tabbatar da dorewa ta hanyar sa ido da kimantawa.

Baba ya tabbatar da cewa gwamnatin Tinubu ta kuduri aniyar fadada shirin GEEP gaba daya, inda wannan matakin na manoma zai zama ginshikin cikakken aiwatarwa daga 2026.

Ya kuma gode wa gwamnatocin baya da ministoci da suka taka rawa wajen ci gaban GEEP tun daga shekarar 2016, yana mai cewa ana ci gaba da yin gyare gyare domin kara inganta tsarin da kuma tabbatar da adalci.

“GEEP yana aiki tare da sauran sassa na NSIP, ciki har da National Home-Grown School Feeding Programme, Conditional Cash Transfer, da Grants for Vulnerable Groups. Duk wadannan suna da nufin rage talauci da inganta rayuwar al’umma a Najeriya,” .